ИНТЕРНА МЕДИЦИНА

ЕХО ДИЈАГНОСТИКА



Ехо на тироидна жлезда

Тироидна жлезда, позната уште како штитна жлезда поради својата форма на штит, е сместена на предната страна на вратот непосредно под Адамовото јаболко (гркланот), од двете страни на душникот. Се состои од два лобуса (лев и десен) кои се споени со еден помал жлездест дел наречен истмус. Тироидните нодули, како најзастапена појава при заболувања на тироидната жлезда може да се појават во обата лобуа или во истмусот. Пореметувањата во поглед на функцијата на тироидната жлезда се карактеризираат со намалено или зголемено лачење на тироидните хормони. Целта на тироидната жлезда е создавање, чување, и ослободување на тироидните хормони во крвта. Овие хормони, тироксин (Т4) и тријодтиронин (Т3), влијаат на речиси секоја клетка во вашето тело и му помагаат на организамот да ги контролира сите функции во вашето тело. Ако имате премалку хормони создадени и ослободени од тироидната жлезда во вашата крв, вашиот метаболизам се успорува. Оваа состојба се нарекува хипотироидизам. Ако имате премногу тироидни хормони во крвта, вашето тело забрзува. Оваа состојба се нарекува хипертироидизам.

 


Кога да се јавите на лекар:

Кај зголемено лачење на тироидни хормони се јавува забрзана работа на срцето, забрзан моталитет на перисталтика, зголемено потење, слабеење, кршливост на ноктите, нервоза, инсомнија. Додека, кај намалено лачење на тироидните хормнони се јавува поспаност, успореност, отоци на нозете и лицето, заборавеност, опстипација, дебелеење и покрај истиот начин на исхрана.

 


Како ги дијагностицираме?

Испитувањa на тироидна жлезда кои можете да ги направете во нашата институција:

Анамнеза:

 Возраст на пациентот – кај помлади од 20 год и постари од 70 год постои зголемена можност за малгна промена. Генетски фактори, надворешни влијанија како недостаток на јод во исхраната, јонизирачки зрачења. Симптоми на хипер или хипофункција на тироидната жлезда.

Лабараториски испитувања:

Со земање на крв се добиваат вредности на Т3 (тријодтиронин) и Т4 (тироксин), хормоните кои што ги лачи штитната жлезда, кои можат да бидат покачени, намалени или во граници на нормала. Тиреостимулирачкиот хормон (TSH) најчесто се испитува заедно со тироксинот (тироиден панел) за подобра евалуација на работата на "feedback" системот во организмот, кој одржува стабилни плазма концентрации на хормоните од тироидната жлезда. Тиреостимулирачкиот хормон (TSH) истотака се користи за: кај новородените за скрининг на хипотиреоидизам, следење на терапија со тироидни хормони кај хипотиреоидизам или анти-тироидна терапија кај пациенти со хипертиреоидизам, при евалуација на инфертилност. Понатаму, тироидните Антитела (антиТПО) може да бидат индицирани за испитување ако докторот се сомнева на автоимуно заболување на тироидната жлезда.

Ехо:

Метода која ни дава информација за локализацијата и структурата на тироидната жлезда како и нејзините патолоишки промени е ехо ултразвук. Тоа е безболна процедура која се изведува непосредно кај вратот каде што се наоѓа штитната жлезда. Со ова испитување може да се забележат промени доколку ги има, во однос на големината на жлездата, симетричноста на двата лобуси од кои е составена, дали има присуство на цистични формации, јазли и сл.